5.10.2006

البكا فى ضل الكبارى

!صورة البروفيل مالقتش غيرها نافعة


و قعد ع السكة
و ربع رجليه فوق تراب الرصيف
بيدور ع الفول
فى نص شقة
رغيف هزيل بياكل أهزل رغيف
و يرمى عيونه على تانى ناصية
و ينفض جيوبه
بيدور ع الفكة
و يغنى زى مراكبى
مركبته على شط الهموم راسيه

آه منك يا قلبى"
أنت فين يا دنيا ؟
يا حلم ضايع
أنا من بعد الضياع .....صايع
ليه دايما لمعاد اللقا ناسية ؟

و بكينى ياللى أنت عارفه أن البكا يحلالى
لا الدنيا هى الجازية
ولا كنت أنا الهلالى
الدنيا دى مهزلة و المأساة فى أحوالى
و الناس من الهم قلوبهم قاسية

و آه منك يا زمن مايع
موعت نفسى
عن العيشة
كممت حسى
بالخيشة
" خلاص يا كبدى ....أنا بايع

ولا هو بايع ولا شارى
ولا هو عن الهم متدارى
بقاله يومين نفسه يتكا
من توهه أضيقها حوارى
و البكا فى ضل الكبارى
يقوم من ع الرصيف الصبح
و بالليل
.......ينام ع الدكة

هناك 8 تعليقات:

عبد الحق يقول...

وبكينى ياللى انتى عارفة ان البكا يحلالى
لا الدنيا هى الجازية
ولاكنت أنا الهلالى

جميل جدا ياسهروردى

kalam يقول...

يا سيدى
قول وسمعنا

Sherif Nagib يقول...

سيف خشب دخلت في خريف الغضب :)

السهروردى يقول...

أستاذ عبد الحق
و كلام
شكرا على الأطراء و التعليق
:)
أبو شريف
لأ يا سيدى سيف خشب مخصصة لشعر الشعراء التانيين ، أما خريف الغضب مخصصة لتجاربى الشعرية فقط
:)
اهلا بيكم

karakib يقول...

:) 7elw ...

shrioo يقول...

ربنا يفك اسر الجميع ويزيح هذه الغمه عن فريب باذن الله
بالرغم اننى لا اعرف السيده ندى القصاص الا اننى تأثرت جدا بكلامك عنها ,ولكن هنيئا لها فقد دخلت التاريخ من اوسع ابوابه لتلحق بالمناضلات الاوائل الذين حفروا اسمائهم على جدران سجن القناطر
بحروف من عرق مخضب بالدماء
واتذكر منهم ان لم تخنى الذاكره
ثريا حبشى, انجى افلاطون,ايفون حبشى
واخيرا تذكر ان اجمل ايام العمر تلك
التي لم نعشها بعد.
معذره لم استطيع الكتابه فى البوست الخاص بالموضوع لخطاء فنى ارجوا النقل فى البوست الخاص بهذا الموضوع معلهش اخوك مبتدا كمبيوتر على كبر يعنى بعد ماشاب ودوه الكتاب واخيرا وليس اخرا خالص تحياتى

Zengy يقول...

shrio : هو علي فكرة أنا و حسين أخويا بنكتب في البلوج ده هو سهروردي و واضح أن أنا زنجي، و أنا كنت قافل التعليقات في البوست الي أنت علقت عليه لأني حسيت بأن الكلام اللي حيتقال غالباً مستهلك و مش حيعزيني في غيابها لأنه لن يخرج عن نطاق كلام أنا عارفه كويس و قلته لناس في مواقف تانية مشابهة بس ده مش بيمنع أحساسي بالفقد و كل اللي كنت عايزه من البوست مجرد نوع من نقوش الفراعنة علي الحيط، علي فكرة سهروردي هو اللي كاتب الشعر

شيريو يقول...

الاخ زنجى
لماذا تفترض ان الكلام الذى سوف يقال مستهلك الا ترى انك تصادر حقنا فى الرد ونحن لن نعزيك فى غيابها بل نعزى انفسنا اولا و اخيرا