5.21.2006

المضحكات المبكيات : ....هلاوس و أوهام

أعود مرة أخرى ...للعبة قطع الرقاب بسيف من الحلوى
...............
و أنا صغير كان نفسى و كنت بأحلم أنى أبقى زى سوبر مان و باتمان و كل أبطال الخوارق ....بس بعد ما كبرت شوية ...صبحت أكبر أحلامى أنى أكون ...إنسان
.............
و كلما حاولت أن أكون إنسانا.....تحرك (زبان العقارب) الذى يقبع فى أسفل ظهرى...و يخرج لسانى المشقوق كالأفاعى من بين شفاهى لاعبا ...يخرجه لى فى المرآه و لسان حاله يقول
هئ هئ ...كان غيرك أشطر-
.........................
صادفت اليوم صديق لم أكن أراه كثيرا ...وبعد أن تحدثنا مليا ...لاحظت أن هناك بعض نقاط الدم و بقايا لحوم تتواجد على أنيابه ...ٍسألته عنهما...فرد متذكرا
آه ...ده انا لسه واكل النهارده فلان-
أستكنرت ذلك عندما تذكرت أن فلان هذا كان صديقا لى و أنتفضت قائلا فى فزع
أبعد عنى يا حيوان-
فرد مبتسما إبتسامة صفراء
ماتخافش ...عمر الديب ما يأكل غير و هو جعان-
.................
الأنسان هو الحيوان الوحيد الذى يحمر خجلا.... أو يجب عليه ذلك
مارك توين
.............................
منذ زمن بعيد ...تشاجرت مع حاضرى ...و هربت إلى الماضى ...أرتميت فى أحضانه...حاولت كثيرا أن أتصالح مع حاضرى...و زمنى...لكننى فشلت ...فكلما قدمت تنازلا ....طلب أخر ....و ظل يطلب و يطلب و يطلب ....حتى طلب صك روحى...فرفضت و أمتنعت...فأصدر حكمه علىَّ ...بالعودة إلى أحضان الماضى ...علماً بأننى سوف أحرم من معايشة الحاضر للأبد
................
بفوت فى كل يوم من التلف بمعجزة
و ينكتبلى عمر من جديد
و رغم علمى أن فترة إنتظارى مش طويلة
و ف آخر الرواية كارثة مؤسفة وبيلة
دأبت أستحضر حاجات مالهاش وجود
تجعلنى أحيا لتانى يوم
بعيون منفجلة و روح مصهلله
و هكذا ثبت
! أن العلاج بالوهم له نتيجة مدهشة
فؤاد قاعود - العنقاء
........................
يوما ما ....سوف أترك البيت الهادئ و الفراش الدافئ ....و أترك أحلام الثراء و الرفاهية تداعب أجفان مشاهدى القنوات الغنائية الفضائية ... الدماء التى تملأ شاشات قنوات الأخبار ....الدموع و التنهدات لمن يشاهدون قنوات الأفلام الأجنبية ....و سأجلس على عتبات الأضرحه ....و الأرصفه ...حتى ما بعد منتصف الليل...حتى ينتهى الإرسال فى القنوات الأرضية...طالبا من الله ...أن يغفر لى كسلى و ساعات نومى العميق
...................
بتدورى علىَّ ؟ ....حتلاقينى مع الحشاشين فى الغرزة ....مع بياعين الخضرة و القوطة الفجل و الشبت فى بوكس البلدية و بوصى الواد رجب على حاجات مش فاكرها...حتلاقينى فى فرن العيش برد على ميت بق جعان و قول " مفيش عيش...شطبنا"...مع الدارويش فى الحضرة و المولد فى السيدة زينب....حتلاقينى صبى ميكانيكى و المعلم بيضربنى علقة بالمفتاح الإنجليزى جوه المحل....و ممكن تلاقينى نايم جنب واحد شحات فى الشارع متلحفين ببطانية صوف سودة.....أو بسوق أتوبيس نقل عام و الفوطة على قفايا و كوبية الشاى الدافية فى إيدى الشمال...أنا يا ملاكى...من يوم ما شوفت بعينيا الأعلانات فوق كوبرى 6 أكتوبر تمنها بيساوى أضعاف أضعاف دخل الناس اللى ساكنه تحتها فى الشرابية...و أنا ماليش عيش غير تحت الأرض
...................
سأضرب في طول البلاد وعرضها.... أنال مرادي أو أموت شريدا.... وأن ضلت نفسي فلله درها... وأن سلمت فإن اللقاء قريبا
الأمام الشافعى
.........................
أثنان يقفان فى وسط صحراء قاحلة ...كل منهما يلبس زى رجال البقر و متحفر لقتل الأخر
السهروردى : أنت اللى يخليك واثق إنك حتقتلنى ؟
جيفارا : لأ ، مفيش ....غيرش بس أنت أقرع و نزهى ...عايز تقتلنى و أنت مسدسك....مسدس ميه
السهروردى : هئ هئ ...يعنى أنت اللى فالح قوى يا خويا ...ما أنت مسدسك مسدس صوت ....نياهاهاهاهاهاه
.....................
الأتنين مجانين
مساكين
معرفش مين
جن مين
كانت تقوله
أوحش واحد فى مصر
يغسل سنانه
مع إن دولابك
مليان معاجين
وليد طاهر
.....................
كلما إزداد الحال العام بالمصريين سوءا ، كلما أزدادت نكاتهم و هرتلتهم على الأوضاع ، تعلو الضحكات أكثر فأكثر ، و يعلو معها صوت البكاء ، يبدو أن أمريكا لو فرضت علينا الحصار الأقتصادى و منعت عنا المعونة التى تهددنا بها...سوف يموت المصريون ليس من الجوع لا سمح الله ....و لكن من الضحك
.............
المشكلة كلها يا سيدى ... أنك معتقد أن الفجر سيأتى بعد دقائق....فى حين أننى أرى أن الساعة تشير إلى الثانية عشر بعد منتصف الليل....كم أنت متعجل
..............
ألا أيها الليل الطويل ألا أنجلِ ...بصبح و ما الأصباح منك بأمثلِ
امرؤ القيس
.............
! فوتكم بعافية

هناك 6 تعليقات:

ماشى الطريق يقول...

إنت عارف ياض يا سهر يا وردى
إنت أنا والله العظيم بحبك إنت و أخوك زنجى ده لله فى لله كده من غير سبب
إنتوا عيال ولاد حلال بجد
انا بحس إنك بتكتبوا من قلبكم وده أهم بالنسبالى من مستواكم الأدبى
إستنى يا جدع لسة حاعلق على البوست بتاعك
إنت بتتطور بشكل فظيع من بوست للتانى وانا شايف إن التدوين و الردود ليها دور كبير فى كده
ده غير إنك عندك قدرة طالب ثانوية عامة مرعب فى إسترجاع كل الللى قراه و إستخدامه بشكل حلو كده
فيه ملحوظة أخيرة أنا كنت ناوى أكتب الكومنت ده من البوست اللى فات بس معرفش ليه كنت مكسل كده
و أول مالقيتك مرازينا ببوست جديد قولت مابدهاش إرزعه الكومنت وريح ضميرك
ونهارك حليب ومستنى الجديد

يحي يقول...

أنا فعلا دلوقتي بدئت افهم
يا سلام

Yasser_best يقول...

هلاوس وتهويمات تبسط ظلها على الحقيقة
تقترب كثيرا من حكايات أكلة لحوم البشر الذين نتعايش معهم يومياً.. وتلمس صراع المصريين في كل زاوية وركن.. بحثاً عن لقمة العيش أو طلباً للقمة القاضي والزلابية كما يقولون

جميل أنت.. وصدقك سر جمالك

yara يقول...

بافوت فى كل يوم من التلف بمعجزة وينكتبلى عمر جديد
مش هاقولك اكتر مكن انك فاهم نفسك وفاهم اللى حواليك بشكل مرعب لدرجة انى حاسة انى قريت كلامك فى عيون كل حد باعرفه

العفريت يقول...

ده طلعت حدوتة حلوة اوى اوعى تخلص الحدوتة حتى بعد ماتموت انت بعد الشر يعنى لا وشر ليه ربنا ياخدك النهاردة قبل بكرة المهم تكون مستعد للنوع ده من الانتقال نياهاهاهاهاه اناااااا العفرييييييت

السهروردى يقول...

ماشى الطريق
أنا مبسوط إنسباط غير طبيعى بتعليقك
شرف ليا و الله أنك تقول عنى كده
نهارك أو مساءك فل

يحيى
أنت فهمت ! طب لو فهت فهمنى علشان أنا مفهمتش اللى أنت فهمته
:P

أستاذى ياسر
فاصل و شعرة دقيقة بين الهلوسة والحقيقة ، شكرا على المرور و التعليق

يارا
أنا ممكن أبقى فاهم نفسى كويس لكن اللى حواليا ماأظنيش و عموما و دا المهم
أهلا بيكى
:)

العفريت
عمر الحدوتة ما تخلص بموت صاحبها و أن مكنتش أنت بتكتبها يبقى غيرك حيحكيها ، انا مستعد لكل أنواع الأنتقال حتى الموت ، لأن محدش بيموت ناقص عمر
أنت عفريت و أنا العوء
و مفيش حد أحسن من حد
نياهاهاهاه