5.28.2006

بفرح



دبستني الأخت غادة سامحوني التدبيسة التالية : أيه اللي يخليني أحب الحياة ؟؟
في رأيي المتواضع اللي يخليني أحب الحياة هو بالضرورة اللي بيفرحني فحجاوب علي سؤالها بطريقتي و حقلب السؤال للصيغة التالية : أيه اللي بيفرحك ؟؟

بيفرحني الجمال، بيفرحني أشوفه و أسمعه و أحسه و أشمه و ألمسه، بيفرحني أحضنه و ألعب في شعره

بيفرحني أني أكون سبب في فرحة حد أياً كان

بتفرحني قعدتي مع أكرم جمب أندريا علي النيل، و تمشية الزمالك، و وقفتي أنا و جنينة نتأمل المعادي الساعة 8 بالليل عند جابكو

بيفرحني التأمل التفلكي المتؤنتخ

بتفرحني رواية جميلة و معاها حتة مزيكا حلوة و لو معاهم عصير فراولة يبقي صباح الصباح

بيفرحني فيلم حلو في السينما يدفعني تأثري بيه أني أعيط

بيفرحني أني أعيد أكتشاف نفسي

بيفرحني أني أقعد أشرب أيرل جراي في سيلانترو مستني رنا و جاكلين الساعة 7 الصبح عشان أشرحلهم أحصاء قبل الأمتحان بساعتين

بيفرحني أنها تبقي قدامي نتكلم بالساعات

بيفرحني لما أثبت قدام نفسي قدرتي و أرادتي في موقف معين

بيفرحني أني أكتب حاجة وأكتشف جميلة

بتفرحني قعدتي مع أصحاب قدامي نفتكر ذكريات سعيدة

بيفرحني أن توقعاتي تطلع صادقة

بيفرحني أني أبقي نافع بشكل أو بآخر

بيفرحني أني أعمل حاجة ليها قيمة مهما كانت قيمتها ضئيلة

بتفرحني سهراتي عند عمرو وسامية

بيفرحني أني أشوف حد بحبه سعيد

أحب أمرر التدبيسة لكل من : شريف نجيب - سامية جاهين - ميندونا - أبو الليل - علي الشاطئ الآخر - و كل من أراد الاجابة علي السؤال أرجوه أن يكون ضيفي

هناك 15 تعليقًا:

Yasser_best يقول...

يا نور البهجة: الذي يفرحك هو الصدق.. صدق الإحساس وشفافية الأيام وإخلاص القلوب
تجمع حكاياتك عن البهجة وتضعها في سلة واحدة.. كأنك صياد يعود إلى منزله محملاً بما وقع في غرام شباكه من أسماك الوجد ومحار الشوق
هل لاحظت أنك استخدمت حواسك كلها في وصف أسباب فرحك: من موسيقى جميلة تشنف الآذان ومحبوبة آسرة يرق لها القلب إلى عصير فراولة تتحرك له مملكة التذوق ورائحة الأشياء والبحر الذي أعرف كم تعشقه.. وصولاً إلى لغة اللمس التي تفتح بوابة الأسرار المستغلقة

عود حميد. لا تغب كثيراً

عبد الحق يقول...

أحلم بوطن فيه ملايين من الشباب يفرحهم مثلك أن" يحضنوا الجمال ويلعبوا فى شعره" تربطهم به هذه الألفة الحميمة فى كل تجلياته: فى أقرانهم من البشر( مفيش خير غير عند غيرك, تعيش فى خيره ويعيش فى خيرك!) فى الفن وفى الطبيعة,فى الصدق مع النفس ومع الآخر,فى احترام قيمة الحق والاخلاص له وحده: الجمال فى العلم وفى الحرية
تدمع عيونى معك اذ يؤرقنى مثلك هذا الشوق المضنى: ان أكون جديرا بهذا العشق الأكبر : عشق الجمال

كن جميلا ترى الوجود جميلا

شاطىء أخر يقول...

بيفرحني التأمل التفلكي المتؤنتخ

رائع يا فيلسوف ربنا يزيد سعادتك كمان وكمان

عبد الحق يقول...

آسف للخطأ الذى وقع فى نقل بيت فؤاد حداد وصحته: مفيش حياة غير عند غيرك تعيش فى خيره ويعيش فى خيرك

Ghada يقول...

أنا شخصياً حسيت بالسعادة لمجرد قراية أجوبتك، فيها جو سعيد غريب... يمكن لتكرار كلمة "فرحة" :)

شكراً على تربيتك الدعوة يا أبو الزنوج

رؤية يقول...

أحييك على روحك الجميلة. شعرت كأنك تركب صاروخا منطلق يخرج بدلا من الدخان ورودا وقلوبا وتمر علينا مناديا إيانا واحدا واحدا لنراك ونبتسم وتنقذ أرواحنا. وها نحن قد تخلصنا من "التكشيرة" :) " وفرحنا بيك.
وبما إني بعيدة قوي عن مصر مؤقتا ، صبرتني شوية لما رسمت بكلماتك قعدات الأصحاب والحبايب التي لاقت هوى في نفسي وهدهدتني مع أغنية يا مسافر وحدك.. آه امتى أرجع بفى
أحييك يا شيكولاته يابو قلب أبيض كبير

سامية يقول...

عشان انت فرحتني بجد لما قلت بتفرحك سهراتك عندنا وعشان انت قلبك أبيض كبير زي ما رؤية قالت، ما أقدرش أرفضلك هذه التدبيسة... مع إني حاولت بكل جهدي قبل كده انني أفلفص من موضوع التاجز ده

أوعدك أول ما الوقت يسمح حتكون أول بوست أكتبها

shady يقول...

يا أخى أنت بتفرحنى

ayhm jzzan يقول...

أنا ما لقيت 20 شغلة بتفرحني
شكلي نكدي ما
نكدي = بحب النكد
نكد = غم وهم
أبعده الله عنا وعنكم

بعد الطوفان والجو شبورة يقول...

جميل من جوة انت أوى يا زنجى
خليك زى ما انت

karakib يقول...

هقول التعليق ده انا عارف اني كتبته قبل كده هو فعلا اجمل اغانينا لم تأت بعد
اجمل اسيامنا لم تأت بعد
الامل .. هو مصدر السعاده ...
العقل البشري الذي يحول من السجن الي قمه الحريه ...
انتوك

Zengy يقول...

أنا متشكر لكل الناس اللي علقت لأن تعليقاتها بجد أسعدتني

ياسر ثابت : يا فندم ربنا يخليك بس أنت دايماً كدا بتحرجني تعليقك أنت و عبد الحق أجمل من البوست أصلاً

عبد الحق : و الله العظيم أنا كفاية أخش أشوف تعليقك علي حاجة أنا كاتبها عشان يبقي يومي سعيد يسعد أيامك كلها يا أستاذنا

علي الشاطئ : و لا أنت عارفة أيه التفلك التأملي ده أصلاً :P

غادة : دا واجب علينا يا فندم

رؤية : علي فكرة أنا مش أسمر قوي يعني أنا خمري زيي زي العرب عموماً

سامية : أنا مقلتش غير اللي أنا حاسه فعلاً و الله يا سامية، ربنا يسعدك أنتي و عمرو زي ما بتسعدوني بصحبتكم

شادي : أنت تأمرني يا كبير

أيهم : ليه بس يا سيدي حتي مش لاقي 20 طب 21 برضه مش لاقي ؟؟؟ :D

ياسر : بحاول و الله يا ياسر أدي أنت بس

أنتوك : هو أنت ليه دايماً تعليقاتك أنا مبفهمهاش يمكن العيب عندي أنا عموماً يا سيدي متشكر أذا كان ده مدح يعني :D

karakib يقول...

لأ العيب مش عندك انا نفسي مش عارف ليه بافهم الكلام عكس الناس
المدونات كلها جو غريب و المدونين اغرب و انا بدأت احس اني فعلا باسقط حالتي النفسيه علي كل اللي بقراه
انا قلت لك كده علشان انا حسيت ان هو ده الرد اللي عايز اقوله لنفسي
مش عارف معلش يا صاحبي انا مش عارف ليه كتبت كده بس اللي ان انا عارفه اني محتاج احس بأمل و احسس الناس بده نتظاهر كلنا بالسعاده و حب الحياه انا بحب الحياه فعلا بس بسبب حلم بيجيلي كل سنه و لسه ما جاش السنه دي !!!
مش عارف شكله مش هييجي يا استاذ زنجي
انتوك

Sherif Nagib يقول...

أنا مش لاقي كلام أقوله بعد اللي قاله عبد الحق ، بس عاوز أقول إنك إنسان جميل جدا يا زنجي.

بالنسبة للتدبيسة.. الله يسامحك.. بس مش حاكسفك.. إنما الواحد يجاوب عن صيغة السؤال الأولى و لا الثانية ؟

شاطىء أخر يقول...

لاء عارفه يا لمض:P
ولو حتى مش كنت عارفه المهم انها حاجه اكيد بتسعدك و ده الاهم