6.19.2006

خمسة شارع المجر

فى خمسة شارع المجر
كل بيوت سادة حزينة
كل القهاوى سكر ع الريحة
و شوارع و حوارى المدينة
محبوسة فى مراية التسريحة
يا مخزنين العمر فى صفيحة
و حابسين اللحن جوه الناى
حارمين السكر من الشاى
البخل ضيع السكينة
ياللى خايفين من القدر
فى بيوت شارع المجر
الدقون بريحة الكولونيات
محلوقة بمكنة بشفرتين
رشيت خمس خمسات
و دعكت بطن الإيدين
حلقت دقنى مرتين
المساجد ريحتها مسك
و البارات ويسكى سك
و أنا ريحتى من الإتنين
ريحتى من بخور الغجر
و من ورد شارع المجر
خلاص نويت على التوبة
مع إنى لسه فى خطيه
حرمت من دى النوبة
و راجعلها بعد شويه
يا بيت ريحتك قليه
خنقنى دخان الشياط
و ريحه عرق البطاط
خنقت روحى بإيديا
من كتر الزهق و الضجر
فى ظلمة شارع المجر
شعرى كلامه مستهلك
و كأنى عايش فى الماضى
ماضى أهلى و أهلك
و بكره ضايع ع الفاضى
ف حكاوى و غناوى و قواضى
و كبد موجوعة و مخاصى
و ذنوبى بتكبر لمعاصى
دموعى نازلة قصادى
نازلة بلون المطر
على أول شارع المجر
صحيت بموت شرقان
بموت فى غاية الإندهاش
هى النهاية الآن ؟
و الممات سرق المعاش ؟
و كأننا ماعشناش
و ماكناش زى ناس
بتعيش لضحكة ناس
بتعيش ليوم ماهواش
منسوج بحزن البشر
منشور ف شارع المجر
لحظات شاب مراهق
أحلامه لبعيد سارحه
بيسلم ع الناس فى سرادق
العزا و بيقرا الفاتحه
وراضى بالدمعه و الفرحه
و طعم ريقه مر العلقم
صدره مشحون بالبلغم
الصمت بإسمنا ناطق
أنا و أخويا و القمر
و رابعنا شارع المجر
دموعى فى عينى بتزغلل
كل ما يهل عليا العيد
أيام علينا تتبدل
فتشكل فى وشنا التجاعيد
كل يوم بعد يوم بتزيد
يا هم ع الأرض قرفص لى -
إمتى الفرح يرقص لى ؟
أكيد حيرقص أكيد -
لصعلوك بيحب السهر
على رصيف شارع المجر
قلتها كتير يا عمرو
المشى أحسن مسكن
رجليا فى لون الجمر
من طول السكة متعكنن
كل شئ فى الدنيا ممكن
بس أمشيها بالطول و العرض
أمشيها و دب الأرض
أوعى الحزن يتمكن
متخافش من شئ أنكسر
ولا تزهق من شارع المجر
ولا تزهق من شارع المجر
ولا تزهق من دى شوارع
تسيب برجلك أثر
على أسفلت الشارع
و أنت رايح و راجع
زارع فى دماغك جنون
منبتة شجرة لمون
بكره تطرح مزارع
و تسمع وشوشات الشجر
فى هدوء شارع المجر

هناك 19 تعليقًا:

Lasto-adri *Blue* يقول...

دموعى فى عينى بتزغلل
كل ما يهل عليا العيد
أيام علينا تتبدل
فتشكل فى وشنا التجاعيد
كل يوم بعد يوم بتزيد



سهرودى.. اظنك عارف رأيي من غير ما أقول حاجة

:)

سامية يقول...

أهه هو ده مود الامتحانات والا بلاش! أنا كنت مستنية منك قصيدة زي دي! أصل أحلى إبداعات بتيجي في الأوقات اللي زي دي
:)

لأ فعلا فيها نقلة جامدة يا حسين.. في القوافي بالذات! وبعدين الأفكار والصور عاملة زي ما تكون شلال مية نازل بدون انقطاع. حتى الوزن أضبط كتير من قصائد فاتت -بس لسه عايز شوية شغل. ما تستعجلش وما تقلقش.. ده حييجي حييجي. المهم ان انت عندك الحاجة اللي ما ينفعش حد يتعلمها: الروح. شعرك روحه جميلة يا حسين

ربنا يفح عليك كمان وكمان

kalam يقول...

دموعى فى عينى بتزغلل
كل ما يهل عليا العيد
أيام علينا تتبدل
فتشكل فى وشنا التجاعيد
كل يوم بعد يوم بتزيد
يا هم ع الأرض قرفص لى -
إمتى الفرح يرقص لى ؟
أكيد حيرقص أكيد

بالصدفه اللى عجب لست ادرى عجبنى
جميله يا سهروردى
قول بقى
من زمان ما قلتش
انا مستنى
:)

zar يقول...

جامده كيك
وحندخل الجنه
وحنشرب الخمره
ماركه العم ايوب

أبو أمل يقول...

حسين طارق/ بعد التحية

راااائع والله اندهشت بصورة
ما حصلتش

جميل
تقريباً دمعت من
الإعجاب

قامتك عالية فى العامية
يا أستـــــــــــــاذ
بخصوص الإيميل
والله كان فيه حاجة انا غيرته وبعتلك إيميل

زورنى قريب

karakib يقول...

كلام جميل من شخص جميل ...

السهروردى يقول...

خير إنشا الله ، أنا على بال ماخلصت كام إمتحان فلسفة و نمت لى شويتين لاقيت الحبايب هلوا
؛P

لست أدرى
عارف رأيك و مقدره و على راسنا من فوق كمان يا ستى
:)

أستاذتى سامية
بلاش موضوع مود الإمتحانات لحسن منعرفش نكتب بعدها حاجة
؛p

و الله كلامك بيشجعنى دايما يا أستاذة و شرف ليا تعليقك ده و الله
و أنا مش مستعجل و لا قلقان على حاجة أبدا، كله بوقته
:)

كلام باشا
أنت مستنى و أنا كمان مستنى
؛P

زار
لأ يا عم أنا بطلت أشرب ماركة عم أيوب أصلها تقيلة على المعدة
و بقيت بشرب خروع قبل النوم
؛P

أبو أمل
أشكرك على إطرائك الجميل يا معلم
:)
أما بخصوص القامة فأنا أقصر من أنى أبص م الشباك من غير ما أشب
؛P

كراكيب
كلام جميل ، كلام معقول مقدرش اقول حاجة عنه
ألا أنت أنتيكا و لا أنتوك ؟

Maxxed`ouT يقول...

أحسنت
أحسنت !

Zeryab يقول...

خمسة شارع المجر ..يا سهروردى..خمسه شارع المجر
المواصلات طب لهناك صعبه
:p

محمود عزت يقول...

جميل :)

الوزن بس زي ما قالت سامية و تبقى القصيدة فالس جميل!

جميل!

السهروردى يقول...

مكسيد أوت
شكرا شكرا !

عمنا زرياب
بص ياريس أى شارع ضلمة هادى و فيه شجر كتير يبقى شارع المجر
:P

محمود عزت
أشكرك ، أخجلتكم تواضعنا
:)

3mr youssef يقول...

مبروك يا حسين البوست الجميل ده انا كنت مستنيه من فترة طويلة ربنا يوفقك وزي ما قلتلك انت بتمشي لقدام اوي وبثبات

أبو أمل يقول...

السلام عليكم
فينك

المزاجنجي يقول...

سحس والله انت مجرم يا راجل ايه الصور الجمالية اللي انت رسمتها دي انت عارف ان انت خلتني اوصل لغاية شارع المجر واشوف البلكونات القديمة الي فيه وشميت ريحه حيطانه وايدي لمست بيبانه روح يا شيخ ربنا يزيدك ويبارك لك وفيك اما بالنسبة لموضوع الوزن مع احترامي لراي سامية والاخ محمود من غير زعل اللي مش عاجبة ميزانك يوزن بره هههههه بس بجد انت تحفة انت عارف ان التصوير بالكلمات شيء مش سهل لكن ما شاء الله انت عملته وانت سايب ايدك فعلا متشكر جدا لك لانك اديتني الفرصة دي اني انعش ذاكرتي واسترجع اغلى واجمل الاماكن في عقلي وقلبي حي القديم في حارة اليهود والله زمااااااان

السهروردى يقول...

أبو أمل
معلش أنا كان عندى إمتحانات ثانوية بس خلصت

من زماااااااان
و الله أنا ممتن لإطرائك يا أستاذ و مش عارف أقولك إيه
:)
أنا اللى متشكر جدا على تعليقك الجميل و مرورك
:)
أما بخصوص شارع المجر فأنا من غير مبالغة مش عارف هو فين بالضبط من خريطة القاهرة للأحياء
:))

Guevara يقول...

حقولك عاللي ما عجبنيش .. بص حسيت إنه كان في حاجة عايز تقولها بس بتتوه من دماغك و انت بتكتب .. يعني كنت بتخسر فكرتك لصالح القوافي اللي في معظم الأوقات جت مقحمة جداً و مفتعلة .. زي

طعم ريقه مر العلقم
صدره مشحون بالبلغم


يعني اضطريت تقول جملة تقيلة على الودن جداً زي (طعم ريقه مر العلقم) عشان تعرف بعد كدة تقول البلغم !!

أو إنك تقول : قلتها كتير يا عمرو

فماتلاقيش حاجة مناسبة تقولها بعد كدة على وزن عمرو فتضطر تقول: رجليا فى لون الجمر !!!!

فمجملا ً ما عجبتنيش القوافي بالمرة و غن كان القصيدة فيها حاجة حلوة فالقوافي دي أفسدتها تماما ً

مش كل القوافي كدة .. بعضها جه غير مفتعل ولا مقحم فكان معقول زي:

المساجد ريحتها مسك
و البارات ويسكى سك

دي نقطة
----------

القصيدة مش باينلها وزن أو غيره .. يعني كأنك بتحاول تكتب قصيدة موزونة و مش عارف .. و ده برضو من العوامل اللي بتتوهك عن الفكرة و انت بتكتب .. يعني لو مش عارف توزن أو تقفي يبقى ملعون أبو الوزن و القافية بس تقول اللي انت عايزه

----------

من حقك ترمي كلامي في الزبالة .. بس لو أنا كنت مكانك كنت حجرب أكتب نفس القصيدة تاني لنفسي .. منغير ما أحاول أوزنها أو أقفيها ـ على سبيل التجربة يعني ـ و أشوف الناتج النهائي بقى ازاي

و دمتم

السهروردى يقول...

أولا : عمرى ما أرمى كلامك فى الزبالة
دى عيبة فى حق النقد
لأن مش ضرورى اللى مايعجبكش ما يعجبش باقى الناس

ثانيا : ملاحظتك على العلقم و البلغم صحيحة تماما و هى جت للضرورة القافية و ده مش عيب قوى مادام مناسبة و لا تفسد المعنى

رابعا : أنا مابعرفش أوزن من الأساس و متعلمتش الأوزان و محاولتى للوزن محاولة فطرية جدا

خامسا : أنت لو مكانى كنت ماكتبتش شعر فى مستوى فشل شعرى
نياهاهاهاه

سادسا : سؤال أخير أنت ليه شرير كده و حواجبك دايما عاقدة ع نية شريرة و أنت بتنقد ؟
:P

الآخر يقول...

عجبتنى
اوى
جميلة فعلا

shrioo يقول...

بوست جميل تقدر تشم فيه عبق الحاره المصريه وجايز علشان انا ساكن فى حى شعبى فكل الصور دى عايشه جوايا وبتطل من كل كلمه فى شارع المجر
المهم مش ها اطول عليك ياريت تطمنا على نتيجه الثانويه العاميه
مع تمنياتى بالتفوق دائما