2.16.2007

آية السيد

كنتي بنت
كنتي أجدع بنت في الوجود
....................................
صدقيني أنا مش ناسي أي حاجة، كنت عيل في أولي إعدادي و فرحان بشعرتين طلعوا في دقني، و أنتي عيلة بتبصيلي بفضول، مش مبهورة بحاجة بس بتتأملي، كان بينا أصحاب و كان بيتك في الشارع اللي ورايا، و لما روحت معاهم أول مرة لقيتك و إتشاكلنا، مكنتش بطيقك، و لا إنتي كمان كنتي بطيقيني، بس كان في حاجة سعيدة بينا في الجو
....................................
بعديها بسنة كنا بقينا أصحاب، نروح مع بعض و نتمشى، حضرتي بنات بالعبيط في حياتي، حضرتي أحداث و حاجات، شفتيني و أنا بتحول قدام عينك، كبرت علي أيدك و كبرتي علي أيدي، شفتك و أنتي بتتحولي من عيلة لفتاة بيتقدملها الخطاب بصفة شبه يومية، عرفت أمك و عرفتي أمي، كانوا يصالحونا لما نتخانق مع بعض، لسانك كان طويل و لساني مكانش أقصر منه، نهب في بعض، و تاني يوم نضحك علي عبطنا، كنتي أطهر بنت عرفتها في حياتي، كنت أكلمك و أنا متفكك و مهدود و كل حتة في دماغي بتهرب من التانية، تهدهديني و تتعلمي فيا إزاي تبقي نص أم و نص صديقة و نص حبيبة و نص أخت، و تخرجيني من تحت أيدك بنا كامل متماسك
..................................
أنا مش ناسيكي، و لا ناسي حاجة حصلت ما بينا، و لا ناسي لما النسيم اللي كنتي بتحبي تسمعيها مني بصوتي المشروخ، مش ناسي الأكل في المطاعم، و التمشية في تراك النادي، مش ناسي ضحكتك العالية و لا وعدك ليا بأن أول ولادك حيبقي أسمه محمد علي أسمي، مش ناسي حاجة يا آية متنسينيش تذكريني أنتي كمان في مكانك
متنسينيش أرجوكي
.................................
رجاء حار و خاص: يا ريت كل اللي يقرا البوست ده يقرا الفاتحة علي روح أكثر القلوب اللي عرفتها في حياتي خضرة .... آية السيد

هناك 13 تعليقًا:

Nour يقول...

..الله يرحمها يا محمد

بكيتني

Sherif Nagib يقول...

البقاء لله يا زنجي، و ياريت مع الفاتحة كمان كل حد يدخل يردد التالي :

اللهم يا حنان يا منان يا واسع الغفران اغفر لها وارحمها وعافها واعف عنها وأكرم نزلها واغسلها بالماء والثلج والبرد ونقها من الذنوب والخطايا كما ينقى الثوب الأبيض من الدنس .
اللهم أبدلها داراً خير من دارها وأهلاً خير من أهلها وأدخلها الجنة وأعذها من عذاب القبر ومن عذاب النار .
اللهم عاملها بما أنت أهله ولا تعاملها بما هي أهله .
اللهم أجزها عن الإحسان إحسانا وعن الإساءة عفوا وغفرانا .
اللهم آنسها في وحدتها وآنسها في وحشتها وآنسها في غربتها .
اللهم أنزلها منازل الشهداء والصالحين وحسن أولئك رفيقا .
اللهم اجعل قبرها روضة من رياض الجنة ولا تجعله حفرة من حفر النار .
اللهم أفسح لها في قبرها وافرش لها من فراش الجنة .
اللهم أعذها من عذاب القبر وجاف الأرض عن جنبيه .
اللهم املأ قبرها بالرضا والنور والفسحة والسرور.
اللهم إنها في ذمتك ، فقها عذاب النار ، و اغفر لها وارحمها إنك أنت الغفور الرحيم.
و صلى اللهم على محمد و الله و صحبه أجمعين.

Solo يقول...

البقية فى حياتك يا زنجى
و زى ما قال وديع سعادة "العابرون سريعاً جميلون" ... دا اللى حسيته من اللى كتبته عنها

Moia يقول...

.....
ربنا يرحمهما يا محمد يا رب.. ان شاء الله تكون دلوقتى فى مكان أخضر زى قلبها... يا رب

Geronimo يقول...

يا وجعي

بجد انت دبحتني بالبوست ده

الله يرحمك يا آية
الله يرحمك ويرحم اللي بيحبوكي من وجع فراقك

سامية يقول...

البقاء لله يا محمد. ما فيش حاجة تريَّح ممكن تتقال في موقف زي ده...

يمكن فعلاً أحسن حاجة تتقال هي زي ما قالت جيرونيمو: الله يرحمها ويرحم اللي بيحبوها من وجع الفراق

Yasser_best يقول...

صديقي الجميل
رحم الله آية

اسمها النقي التقي يرسم الآن صورة لها في مخيلتنا..وتكتمل الملامح بكلماتك التي تقطر حزناً وعذوبة

رحمها الله وأسكنها فسيح جناته

Aladdin يقول...

يبدو أن فبراير، لا شهر ابريل، هو شهر "القسوة"!

حقٌ أن لكل انسان حظ من اسمه!

"*~Daisy~*" يقول...

ba2a awwel magy 2alqy nazra, te2atta3 2alby kedA?
allah yer7amha

adhm يقول...

البقاء للة
رحمها اللة القادر الرحيم الغفور
كلمات تقطر صدقا

Ossama يقول...

البقاء لله يا محمد
تعيش وتفتكر

lost يقول...

RABNA YR7MHA YARAB

naryoma يقول...

ربنا يغفرلها ويرحمها
ويدخلها فسيح جناته امين