3.06.2007

شعر البنات

إلى منى وفاطمه... والرومانسيات الحالمات.. وبنات إلى الأبد... إلى الأبد
*
شعر البنات فى المحاضرات
شعر رومانسى عبيط
بسيط ماهوش غويط
شعر البنات يا حضرات
أرق من أحلامكم
العقيمه
القديمة
قليله الحيله والقيمة
تتمنى فارس
من فوارس السيما
يكون من حلالها
ويحلالها
تعديه فى وسط المحاضرة
على كل بنت حاضرة
عشان تقراه
شعر البنات فى الجامعه
لا هو شعر حداثى
ولا هو سياسى
ده بتغزل فى صدر حنون
وبيعتب على القلب القاسى
والدنيا القاسيه
والناس الناسيه
-اللى بتعقد مش سامعه-
أحلامهم البسيطه
فى الجواز والعيله والخلفه
وبيت مليان حب وألفه
شعر البنات
ورد مقفل خجلان
تجرى فيه الغزلان
قافيته حنيّنه
تحضن وتضم
زى قلب الأم
لا بيخطب فى الأمة
"ولا يهتف ب"هلما
ولا حتى يقول ثمَ
مفيش ثمَ
مصير البنات يتستتوا
والولاد يتجندوا
ويخلصوا تجنيد
والبنات تبطل تعديد
على البطاله والعنوسه
ويرحمونا من شعرهم

هناك 14 تعليقًا:

سامية يقول...

هاها! حلوة يا حسين. فيها حتت حلوة قوي وفكرتها جميلة

Omar يقول...

هههههه عايزين نجوّزك بقى ونخلص، ده انت وصلت للشعر شخصياً، الموضوع كدة ميتسكتش عليه ابداً، مين عارف بكرة تعمل ايه، نلاقيك بتعزمنا على اول معرض ليك ولا حاجة، معلش هو البنات اليومين دول نظرها ضعيف شوية، لكن لو وقفت عند محلات النضارات احتمال تلاقي حاجات مش بطالة :-)

Tamer يقول...

ممممممممممممم
كويسة جدا يا كابتن
المطلع اقوى ما فيها
وفيها تركيبات جميلة

مش هقولك استمر والى الامام والكلام دا
لان ماتعرفش الامام دا بيخلص امتى :d

عموما .. جميلة فعلا

hesterua يقول...

بجد حلوة جدا وعذبة وصادقة قوى

السهروردى يقول...

سمسمه
تشكرى
:)
أنت عارفه أنا باعانى قد إيه فى المحاضرة إياها
دايما كده بتنصفينى

عمر
اى نعم صحيح انا عايز اتجوز
لو عندك عروسه مناسبه ماتبخلش على اخوك

معلمى تامر
ياه يا راجل بقالى كتير ماسمعتشى منك كلمه جميل على حاجه من فترة طويله
وعموما ... شرفتنى ونورت المدونه

هستيريا
بجد انا مبسوط على زيارتك وتعليقك عشان دى اول مره تعلق على حاجه ليا
نورت
:)

Dananeer يقول...

تخيل انا اول ما وقعت عينى على اول كلمتين افتكرته شعر البنات مش شعر بكسره
:)

للدرجادى مغلبينك

Ossama يقول...

لطيفة جدا يا حسين
بس بدري قوي ع الجواز يا بني
ده غلب

Memo يقول...

اول مره اجي المدونه دي
و برضه سمعت عنها بالصدفه
تحياتشي

خجل يقول...

هوا دا فعلا اللي بيحصل في الكليه

والميزه هنا..ان اللي تكتب العيال يقولوا عليها شاعره

وأحيه بقا..لو دخلت نادي أدب الجامعه

Geronimo يقول...

بالذمة لو مكنش شعر البنات حلو وناعم ولفت نظرك كنت هتعبرهم وتكتب عنهم

وبعدين اه فيه فارس وحصان
وحضن وبيت وألفة

احنا صرحاء مع انفسنا
مش زي الرجالة
نكتب عن الحبيبة والنهود ونتمسح ف الرمزية ونقول الحبيبة هي الوطن

السهروردى يقول...

دنانير :
آه وحياتك ده انا طالع عينيا الجوز
:)

أستاذ أسامه :
ما انا عارف والله يا دكتور
حضرتك حتقولى لسه
:)
شرفتنى بتعليقك

ميمو :
نورتى !

خجل :
ولا عمرى حاعتبها !

جيرونيمو :
ناعم أى نعم
حلو ما أظنش خالص
آخر شاعرة احترمت شعرها كانت الخنساء يا جيرونيمو
:)

شجره الدر يقول...

واضح بقى ان شعر البنات ده عدى عليك
مش عاجبك
ياسلام
كل البنات بتحلم
وبتكتب
وبتحب حتى لوماكان عندها حبيب
مستكترين علينا نكتب شعر
مش كفايه علينا مستحملين بطالتكوا وقعدتكوا فى البيت
وشايلين همكوا
سواء
اخواتنا
او احبابنا
او متجوزينكم
او اولادنا
عايزين مننا ايه تانى
------------
بعيد عن ده كله بقى
المدونه عجبانى مووت
انا قريت المواضيع فى الصفحه الاولى
جميله
اسلوبك هادى ورايق كدا
تحياتى

السهروردى يقول...

شجر الدر :
شرفتنى يا فندم
أى كان رايك
:)

Just Me يقول...

:)
حلو اوى