4.18.2007

تماشياً مع الموود

متفهمش اليومين دول أيه اللي بيجرا، أنا مبسوط و كفى، من غير فلسفة و لا تنظير و لا وجع دماغ، قفشت نفسي و أنا مبسوط من كام يوم، و يصاحب هذا الإنبساط تضخم بسيط في الأنا، لن يلبث أن يفش علي خير بإذن الله دعواتكم، حاسس برضا مفاجئ عن نفسي و عن الكون، و إطمئنان شديد لأن بكرة حيكون يوم لطيف و بعده حيكون ألطف، علي الرغم من أكوام الكتب اللي عايز أقراها و اللي قاعد أشتريها و أكومها من غير ما أقرا بمعدل يناسب الشرا اللي بشتريه -دا غير اللي بستلفه بطبيعة الحال-، و المساحات الضخمة من المزيكا و الأفلام اللي عايزة تتشاف و تتسمع، إلا إني مش قلقان بشأن حاجة، و دا أحد الأعراض المخيفة لإنبساطي الأهبل.
علي كل حال، أنا حابب أهدي كل الحبايب و الأصدقاء و كل من لديه القدرة علي التمتع بالموسيقي عموماً التراك اللطيف ده من فيلم Snatch.
دمتم بخير ...

هناك تعليقان (2):

Sanaa El-Banna يقول...

الحمد لله
وعقبال اللى زيى مايفرحوا كده
ولو انى مش باستمتع بالمزيكا بتاعتك دايما
لكن يللا مش مهم

Ossama يقول...

يا الف نهار ابيض
والله واحشني يا واد يا محمد
مع انك مبتسألش
لكن لك وحشة وبالرغم تغييرك لشكل المدونة وتقوم منزلني تحت خالص كده
بس بجد واحشني
شد حيلك وربنا معاك
ابوس ايدك انجح السنة دي وابقى ابعت لي ايميل طمني
كنت عايز اكتب عنك انت وحسين
لكن مأجلها شوية بعد نتيجتك
وحكتب مهما كانت
بس ارجوك متكسفنيش يا محمد