5.28.2007

وكانت السنة رقم 18

إلى شوباك... أفخر بجوزائيتك أيها الرفيق الإسكندرانى
*
طبعا أنا دخلت على جوجل وجبت شوية كلام عن خصائص رجل برج الجوزاء، وإلى حد ما بعيد أنا مؤمن فى موضوع خصائص مواليد كل برج والكلام اللى بعض الناس بيعتبروا هجص وأحيانا كفر
المهم إنى أخترت شوية صفات أنا شايف نفسى فيها، وتجنب ذكر صفات أنا شايف إنها مش فيا أو على الأقل بأرفض إنى أعترف بيها قدام نفسى، الكلام الجى لا يخلو من نرجسية مفرطة فى رأيى يعنى بس ده مسموح لأن إمبارح كان عيد ميلادى
  • مولود برج الجوزاء ذكي سريع الخاطر سليط اللسان - إذا أراد - فضولي محب للاستطلاع , يجيد عمل شيئين أو أكثر في آن واحد و بسرعة تفوق سرعة من يقوم بعمل واحد

وده صحيح فى موضوع سلاطة اللسان واللى مش مصدق يروح يشوف عرائضى عند العم أبو الليل، من ناحية فضولى روحوا إسألوا محمد أخويا طبعا، بالنسبة لصفة الأخيرة، بالنسبة للأخيرة فده صحيح نسبيا بس مش قوى كده

  • يبرع في الكذب و لكنه يأباه بسبب مثاليته . إذا حرف الوقائع كان السبب اتساع خياله . حبه للسخرية يقوده إلى ارتكاب الخطأ عن قصد وفي حالات نادرة جدا يصل به الأمر إلى حد الإجرام .

الصفة الأولى صحيحة واللى مش مصدق يروح يسأل أبويا وهو حيقولك إن حسين عمره ما كدب عليا تفهم على طول إنى أكبر كداب عرفته البشرية كلها لأن مفيش حد فى الدنيا ما كدبش على والده، البقية أى نعم صحيح

  • بما أن عقل مولود برج الجوزاء يعمل بصورة مستمرة تصبح حاجته إلى النوم مضاعفة , لكن الأرق كثيرا ما يصيبه . أعصابه المشدودة و خلاياه التالفة تتطلب الراحة و التجدد . تفيده الشمس و الهواء النقي و الأجواء الخالية من التلوث .

أكتر واحد بينام فيكى يا أم الدنيا، ده حتى تدويناتى الأولانية مش بتخرج إنى بأصحى من النوم وأروح أنام تانى، بأعتبر إن النوم متعة لا تنافسها أى متعة حيوانية أخرى، طبعا بأعشق الشمس لدرجة إنى كتبت فيها أول مشروع شعرى ليا

  • يقرأ بسرعة مذهلة , و كثيرا ما يبدأ بالصفحة الأخيرة ثم يعود القهقرى مقلبا الصفحات بعصبية , ولا يستبعد أن يشعر فجأة بالملل فيترك الكتاب وهو لا يزال في منتصفه .
  • ينظر إلي الغد وقليلا ما ينظر إلي الماضي , مستعد دائما لاستقبال يوم جديد

لا تعليق أى نعم صحيح برضه


الطفل الجوزائى*

  • إن طفل برج الجوزاء باختصار - و خصوصا بالنسبة إلى والدته - غذاء روحي عظيم و إن كان غذاء مرهقا لأعصابها في بعض الأحيان . و يبدو أم وجود مثل هذا الطفل في عائلة ما يكسب جميع أفرادها الشعور بالشباب و الحيوية الدائمين

أنا حاسس إنى لو مت بدرى البيت حيبقى سمع هس من غيرى لفترة طويلة

  • و يحرف الحقائق ملونا إياها بشيء من خياله الواسع . يتهمه البعض بالكذب و يصر على معاقبته , لكن كذبه ليس أكثر من تحوير أو تلوين كما قلنا , منشأه أحلامه و تخيلاته الكثيرة , و كثيرا ما يقع هو فريستها فيصدق تماما ما يقول . إن صده أو عقابه لا يجدي

هنا أسألوا والدى وهو فاكر الحكاية دى كويس، مرة واحد ضخم الجثة عريض المنكبين شلولح ضربنى علقة، ورجعت قلت لأبويا إنى رزعت عشر عيال عندنا فى المدرسة الإبتدائية علقة سخنة وبعدين ربطتهم كلهم بحبل ليف وسلمتهم للأبلة الناظرة وطبعا أبويا بيضحك وهو مش مصدق بتاتا إنى إبنه اللى عامل زى القلم الرصاص المبرى عمل ده وبعدين السؤال المهم: منين أنا جبت الحبل الليف ؟



الرجل الجوزائى*

  • الجوزائي لديه أسلوب إقناعي ناجح حتى ولو لم يكن مطلع كفاية علي الموضوع الذي يتكلم عنه

سوفسطائى عظيم

  • أبرز صفات الرجل برج الجوزاء القلق و عدم الارتباط , فيجب ألا تغيب هاتان الظاهرتان عن ذهن المرأة التي تنوي ربط مصيرها بمصير زوج من هذا النوع , وأن تعلم أن الحب في نظره شيء و الانسياق وراء مزاجه الخاص شيء آخر . هذه النظرية وحدها كفيلة بهدم أسعد البيوت و أكثرها استقرارا إلا إذا بلغ حب الزوجة و إخلاصها و استعدادها للتضحية الحد الأقصى . وفي هذه الحالة تنقلب حياتها إلى نعيم دائم , لأن في رجل برج الجوزاء مزايا قلما توجد في مواليد الأبراج الأخرى . يكفي أن الوقت يمر إلى جانبه كلمح البصر , و أن الرتابة و الملل يغيبان عن دنياه بلا رجعة . و إذا قال لزوجته أحبك , قالها بعشرات الأسباب و اللهجات . وفي دعواته لها طرافة ما بعدها طرافة . يقودها إلى المطاعم و المسارح و دور اللهو و المتاحف و الشاطئ و الجبل و إلى أماكن أخرى لا تخطر ببالها . يحدثها عن كل أمر و موضوع لأنه بحكم إطلاعه و ثقافته العامة يعرف الكثير و الكثير ولا يكاد يجهل شيئا . إلى جانب ذلك لا يستبعد أن يخرج من بيته على أمل الرجوع بعد ساعة و تمضي الأيام و هو غائب , أو أن يبدو مشغول الفكر تائه النظرات موجودا في الجسم فقط مما يجعل زوجته تتساءل عن الأسباب و تحسب ألف حساب .

كل السالف ذكره صحيح، مع وضع الإعتبار إنى لسه غير متزوج أو حتى مرتبط

  • لو خير لاختار الزواج أكثر من مرة
  • انه قليل الغيرة لبعده عن روح التملك سواء لنفسه أو لغيره . الحب في رأيه أكثر من ارتباط جسدي . إنه المشاركة الروحية و العقلية و الجسدية معا
  • يقال أن ازدواجية هذا الرجل تجعله يسعى إلى حبين في آن واحد , و لا يعني ذلك إنه يحن إلى امرأتين في وقت واحد. يبدو الأمر من قبيل الأحاجي , أليس كذلك ؟ من الصعب على كل حال أن يرضى رجل برج الجوزاء بالمرأة القليلة الذكاء , و لن يختار إلا صاحبة الفطنة و الحيلة و المرونة . و ليس يصعب على هذه أن تدرك سر طبيعته و أن تبدو على النحو الذي يرضيه و يرضي ازدواجيته

وفى النقطة الأخيرة الجملتين الأولانين هما صح الصح بقى، لأنى عملت الحركة دى أكتر من مرة فى حياتى، أميرة وحنان، حنان وإنجى، حنان ونادية، حنان وعلا

  • رجل برج الجوزاء محبوب من الأطفال عامة ومن أطفاله خاصة , تربطه بهم علاقات حميمة تقوم على الثقة و المكاشفة و تبادل الآراء و المعلومات . من سيئاته القليلة كأب فشله في فرض النظام و إكثاره الوعود التي يصعب عليه تحقيقها. حدة لسانه تسيء لكرامة أولاده في بعض الأحيان لكن طيبة قلبه غالبا ما تمحو أخطاءه.

مع وضع الإعتبار إنى لسه معنديش أولاد لأنهم -أياً كانوا- لسه مخترعوش الخلفة باللاسلكى، فمعرفش حقيقة الوضع ده إيه؟

وأخيراً

  • يكره ملاحقة الفرص لكن يقبلها عن طيب خاطر إذا أتت بدون عناد.
  • صديقه المفضل نصفه الثاني : ألم نقل في البداية إنه شخصان ؟

وكل سنة وأنا جوزائى معتدل

5.27.2007

TO HELL WITH THE WORLD

و هذا هو الحل السحري لكل الأشياء
دين أم كل حاجة مش عاجباني، و كل حد مش عاجبني
و كل حاجة بتضايقني و كل حاجة إحتمال تضايقني
كل رأي بشوفه سلبي و كل حد بيستهلك مني طاقة
دين أم الغباء و التعالي و الكدب و الإدعا و الإفترا و الظلم
دين أم كل واحد بيتصف بالصفات دي
و أي واحد بيتعاطف مع أي واحد بيحمل الصفات دي
دين أم إحتمال وجودها أصلاً في الحياة
دين أم أي واحد لا يحتمل وجودي
و أي واحد مبيطيقنيش
يشرب من البحر و لو مكفاهوش يشرب من المحيط
دين أم أي واحد معتقد في نفسه المعرفة الكلية و بيتعامل من المنطلق ده
دين أم اللي فاكر نفسه خالي من التناقضات و قاعد باصص على تناقضاتي
دين أم كل و أي حاجة مش جايّة على مزاجي بالظبط
TO HELL WITH THE WORLD

5.20.2007

عام





النهاردة يكون عدت سنة و ست أيام على الذكري الأولى للتفلك التأملي المتؤنتخ


لمزيد من التفاصيل إرجع هنا و هناك

..................


اليوم ده كان يوم غريب جداً، دا كان آخر يوم لكريم و طلعت في القاهرة و تالت يوم على التوالي أشوف فيه كريم، كلمني الساعة التلاتة قاللي إنزل إحنا في الحرية، رحت و إتفاجئت بالناس الكتير اللي أنا مكنتش أعرفهم -ولسة معرفهمش بما يكفي لحد دلوقتي-، قعدنا على الحرية شوية، و بعدين قمنا منفذين النشاط الأهم في اليوم ده، "تفلكنا" و ما أدراك ما التفلك و الشمس بتغرب و الصحبة الحلوة، صوت بنت من اللي معانا كان حلو فعلاً، لسة فاكر حاجات من اللي غنيناها، لسة فاكر إن ده كان أول يوم في حياتي أتغلب فيه على كسوفي و أغني قدام مجموعة من البشر، غنيت ساعتها خلاص لوسط البلد، و طلعت غنى "غنا" لكاميليا جبران، و جاسر و يسرا و أنا غنينا "أنا أتوب عن حبك" للشيخ إمام، و غنينا حاجات كتير لمنير شبابيك و شجر اللمون و حاجات تانية مش فاكرها بالظبط دلوقتي، كانوا ساعة، و كانوا عمر في نفس الوقت، أحلى ساعة عدت عليُّ في حياتي، مش مهم دلوقتي -بعد سنة من الحدث- أنا فين و كل واحد من اللي حضروا الحدث ده فين، و مكانش في دماغ حد فينا يا ترى حنكمل مع بعض لحد ما تعدي سنة كاملة و لا لأ؟؟!، المهم صحيح إن الوقت ده كان وقت تجلي إلهي متكررش لحد دلوقتي في حياتي.


شكراً يا كريم و يا طلعت و يا يسرا و يا جاسر و يا غادة.


و كل سنة و إحنا طيبين و فاكرين لو قدرنا.

5.07.2007

3 بنات

هذه التدوينة حباً و كرامة لل 1، 2، 3 دول

الأولى:

سنة تقريباً إتغيرت أنا فيها، إتغيرت الحاجات من حواليا بسرعة البرق، سنة ده الوقت اللي عرفنا بعض فيه، فاكرة أول مرة خبطنا فيها في بعض، كانت هناك ... بعدها مش عارف إيه اللي دفعني إني آخد مايلك من البروفايل و أكلمك، يا نور .. إحنا يمكن اللي بيننا مش بالكثافة اللي تسمحلنا إننا نطلق علي بعض أصحاب مقربين، يمكن الأماكن اللي كنا فيهامع بعض يمكن حصرها بسهولة "المجلس الأعلى – الساقية – النادي – شارع 26 يوليو – Cilantro – ديوان – شارع شهاب – ميدان عبد المنعم رياض"، بس أنا لازم أعترفلك بحاجة، كل مشهد إنتي فيه كان مشهد سعيد في الغالب، أنا مقدرش أنساكي تاني يوم آية توفت فيه، كنتي أول واحد "صاحبي" أقعد معاه بعد ما عرفت الخبر، قعدت إسترسلت معاكي كتير عن آية، و عن الموت، و مشيتك في الحتت اللي أنا و آية كنا بنتمشى فيها في النادي، مش ناسي قلقك عليَّ، مش ناسي صوتك النص نعسان و إنتي بتقولي كل شوية "تمام" عشان تشجعيني أسترسل في أي حوار بحوّر فيه، مش ناسينا و إحنا قاعدين ندور علي محل نصور منه بطاقتنا عشان المقابلة بتاعت الMBC و مش ناسي الفيلم بتاع الراجل الإيراني اللي إنتي محبتيهوش، و مش ناسي سبعين كادر إنتي طالعة فيه لونتيهم بلون مفرح و خليتيهم أكثر بهجة.

................................

الثانية:

أما إنتي يا ذات القلب الأخضر، يا حريفة العياط في الشارع، أنا أعمل فيكي إيه بس، إنتي كمان عدى علي وجودك في الحياة سنة، و إذا كانت ذكريتي أنا و صديقتك اللي سبقتك، مش ذات كثافة ضخمة –كمياً- فأنا و إنتي مابينا كتير، مشاكل و خناقات، و مجتمعات خانقة لقينا نفسينا أطراف فيها، و إهتمامات مشتركة و ناس، بس علي الرغم من كل مؤثر سلبي حصل في الحياه، علي الرغم من الجفا اللي ساد لفترات، الحاجات صفّت نفسها بشكل من الأشكال، و إنتي بقيتي، مش عشان إنتي كويسة أو وحشة، بس عشان الناس بتستاهل بعض.

................................

الثالثة:

فراشتنا البمبي العظيمة، العيلة ذات ال22 سنة، إحنا مبقالناش سنة و لا حاجة، و لا لينا من الذكريات المشتركة ما يؤهلني في الغالب عشان أكتب عني، دي محاولة يائسة بس، محاولة يائسة للتفريج عن قلبك اللي شايل فوق أحماله بكتير، يا بنتي ... إنتي كنتي أجمل نسمة هوا عدت عليا من وقت مش بطال، نقائك لخبطني، لدرجة إني في مرحلة من المراحل كنت حاسس إننا مش حنعرف نتعامل، أنا مش ملاك و مبعرفش أتعامل مع الملايكة، بس الملايكة علي كل حال طلعوا أقدر علي الإحتفاظ بعلاقات آدمية من البنى آدمين ذاتهم، أما إنتي ... فإنتي أجمل من تصورك عن روحك، و أجمل من اللي الناس شايفينه منك، إنتي المثال الحي ل"كبايات عصير قصب مليانة علي الآخر .. و الخلق مبتشربش"، متزعليش يا بنوتة إن الناس مبتشربش، بكرة اللي يستاهل عصير القصب يشرب لحد ما يرتوي، يشرب لحد ما البشر كلهم يرتووا برواه.