1.11.2009

مناخوليا 2020

Melancholia: it is a mood disorder of non-specific depression, characterized by low levels of enthusiasm and eagerness for activity.
*
في المدينة الشمالية البعيدة، بعد ما ساب كل الحاجات وراه، إحباطاته وذكرياته الطيبة، وإبتدى على نضافة، قطع صلاته بدنيته القديمة، صلات كانت هشة أصلاً بعد موت أمه، حب وكره وحب وكره وعرف بنات، مكانش فيهم واحدة في جمال حبيبته القديمة، بس كان في واحدة تنفع زوجة، طيبة بالقدر اللي تسمح بيه برودة المدينة، جاب منها ولد ما يعرفش ينطق إسمه صح، وطلقها وخسر بيته والولد، في الليلة دي بالذات، بعد ما سهر مع زملاء الشغل –معرفش في المدينة إصحاب- يتفرجوا على النيكس والبولز ويسكروا، رجع البيت الجديد، فتح التليفزيون، وإتفرج على مدينته القديمة بتتدك بالقنابل الفراغية، إبتسم وراح لدرج المكتب وفتحه، وفكر قد إيه المترو حيكون لطيف فى الوقت ده بالذات، رفع المسدس - اللي إشتراه أول حاجة لما نزل في مدينته الشمالية البعيدة – لبقه، وضغط الزناد.


ليست هناك تعليقات: