8.20.2009

خدادية النوم السلطاني

النوم يا ملاكي النوم.. سلطانك.. عزيز عينك
لما تتاوبي في وسط قعدتنا، لما الدنيا تغيم وتروق في عينيكي، لما راسك تتقل وتخف
ما هواش تعذيب، جحيم الفوقان والصحيان، جمر الأسماء، التفاصيل، الوشوش بيلسع
النسيان، التدليك، المشط يحلّ شعورك وخيالاتك المعقودة، قميص نوم يرّق عليكي ويشف ويطير، تفردي بدنك على ضهر الهوا وتغيبي في أحضانه، وتضمي شفايفك السُمر زي الرضعان وتبوسي فُم الناي، عدى الهوا في الناي خلاه يصفر صفير خفيف
ليالي نومك بساتين، أزبكية نص الليل، نور ضعيف، سهارة لأجل نومة متونسة سرحانة في الأحلام
قولي مفيش أحلى من الناي، لما تريحي راسك على المخدات، وعينيكي تروح في النوم شوية بشوية، وأنتي بتسمعي جوقة من الملايكة بتغني لك "طفْ يا درّي" على همسه السارح اللامتنهي

ليست هناك تعليقات: